»نشرت فى : الثلاثاء، 24 مارس 2020»ليست هناك تعليقات

رسالة الى المغاربة وجميع الجنسيات الاخرى موعد مع الوطن تحت شعار #خليك_فدارك


رسالة الى المغاربة وجميع الجنسيات الاخرى موعد مع الوطن تحت شعار #خليك_فدارك

فيروس كورونا، حملة تحسيسية،حملة توعوية،خليك فدارك

رسالة الى المغاربة وجميع الجنسيات الاخرى موعد مع الوطن تحت شعار #خليك_فدارك


السلام عليكم عليكم و رحمة الله تعالى وبركاته معكم غزلان نيابة عن كل طاقم موقع  فنون الطبخ  مواطنة مغربية غيورة على البلد ديالها بلدي الحبيب المغرب . بدوري قررت نشارك فالحملة التحسيسية لخوتي المغاربة تفاديا لانتشار هاد الوباء فيروس كورونا المستجد . ولو اني عارفة بان عدد  المتابعين قليل بزاف ولكن ايلا قدرت اني نأثر اولا نقنع او نوصل رسالتي غير ل 10 د ناس فهاد 10 غدي يوصلوها ل 20 و 50 و 100 وهي غادا . بغينا الناس ياخدو هاد الحملة هادي بنوع من الجدية  ويلتزمو بالنصائح لي مقدماها وزارة الصحة . تفاديا لانتشار هاد الفايروس هذا. كنتمنى من جميع المتتبعين ديال الموقع انهم يلتزمو بهاد النصائح باش ان شاء الله نتجاوزو هاد المرحلة المهمة او هاد الظرفية الصعبة لي كندوزو منها .  رسالتي غدي تكون مقتضبة لكل مواطن مغربي ولكل انسان سواء مغربي او من جنسية اخرى.

خوتي خواتاتي الله يجازيكم بخير كنعرفو هاد الظرفية الحرجة لكيعيشها البلد ديالنا او العالم ككل للقضاء على هاد الفايروس الوبائي .رسالتي لكل مواطن مغربي هو الالتزام بتعليمات السلامة واخذ كل الاحتياطات الله يخليكم مانخرجوش نخرجو غير للضرورة كيفما كنعرفو الدراسة توقفات فالمدارس ولكن راها مستمرة فالبيت الوليدات يبقاو فالدار مايخرجوش يلعبو برا نكونو مسؤولين ونكونو منضبطين وملتزمين .
 عفاكم تجنبوا اللقاءات مع الناس وحبسو السلام على الاقل هاد الفترة فهاد الظرفية الصعبة لي كندوزو منها لان المرض تيضور ومتيعزل حتى شي حد اي واحد يقدر يكون مريض ويقدر مايكونش عارفها هادي وحدة ثاني حاجة الانسان دائما يغسل ايديه بالماء و الصابون ايلا كنتي فالدار . وايلا خرجتي للضرورة هز معاك معقم لي غدي نصاوبوه  معاكم دبا شوية غدي تلقاو الوصفة مكتوبة في الموقع وحتى على شكل فيديو في القناة على يوتيوب لاننا مابقيناش تنلقاوه في الصديليات وحتى فالبارا او محلات بيع المنتجات الشبه صيدلية،  فالكمية لي تيجيبو دغيا كتسالي .  فهاد المعقم هذا فحالة مكاينش الماء هو راه  يفي بالغرض والا فعافاكم قطعو العلاقة بين يديكم ووجهكم فهاد الفترة حتى تغسلوهم عاد تقدرو تقيسو وجهكم .
باراكا من الاشاعات لي كتخلي النفسية ديال الناس مريضة وكولشي مخلوع راه حتى الخوف كينقص المناعة نديرو ثقتنا فالله سبحانه وتعالى و نتعاونو كاملين باش نعيشو كاملين
ايلا بقيتي فالدار راها فرصة باش ترتب حياتك وتفكر فبزاااف ديال الامور بايجابية استغلو هاد الوقت الصلاة والذكر و الدعاء لي محتاجين ليه بزاف فهاد الفترة  .مغديش ندخل فالجانب الديني دكشي تيبقى بينكم وبين الله . كيما قلت ليكم استغلو الوقت تقدرو تقراو كتوبة استغلو هاد الوقت فلي ينفعكم . والسيدات ربات البيوت الحادكات كل مرة شهيوة جديدة من دكشي لي موجود فالدار ماشي تقداو بالكثرة و تكدسو فالستو كيما دارو شي وحدين سامحهم الله فعطا الله ماديروفالدار  وهكا خلقو السعادة و خليكم فالدار حميو راسكم وحميونا من الخطر .
كنتمنى تبارطاجيو هاد المقال وحتى الفيديو ماشي بالضرورة هاد الفيديو بارطاجيو الأفكار لي خديتوها منو نشروها بين الناس . النااس لي هوما عائلتكم . صحابكم.  فالواتساب الفيسبوك انستاغرم وفكاع لي بغيتو.  المهم توصل لأكثر عدد من الناس.  خليونا نحميو بلادنا نعتقو بلادنا .حتى حنا نقدرو نكونو احسن من الصين لي قدرو يتغلبو على الفيروس. خليونا حتى حنا نبينو للعالم اننا شعب واعي وقادر يتجاوز اي محنة اي ازمة اي ظروف قاسية خليونا نكونو عبرة والعالم كلو تيهضر على ان المغرب قدر دولة و شعبا انهم يتفاهمو ويديرو يد فيد باش يتغلبو على هاد الفيروس ان الشعب المغربي كاملنا تافقنا نديرو  الحجر الصحي بلا عصا بلا قرار المطلوب منكم حاجة وحدة هي الإنضباط والالتزام بالارشادات والتدابير الاحترازية لي هي فالصالح ديال الجميع  بقاو فديوركم الله يجازيكم بخيرر خليكم فديوركم ولا راه غدي تخليو ديوركم بيديكم هذا هو الحل الوحيد لي عندنا فهاد المرحلة ولي مجبر انو يخرج وكيخرج فقط  للضرورة فيدير الاحطياطات ديالو  مافيها باس ديرو الكمامة والليغات وفاش توصلو للدار عقمو عقمو عقمو عاد دخلو نسأل الله السلامة والعافية إذن اخواني اخواتي متتبعينا الكرام الأعزاء حافظو على واليديكم  وليداتكم ازواجكم خوتكم حافظوا على بلادكم وباش تعاون بلادك خليك فدارك والسلام عليكم ورحمة الله تعالى وبركاته

    اضف تعليقاً عبر:

  • blogger
  • disqus

الابتسامات

0102030405060708091011121314151617181920212223242526272829303132333435363738394041424344

design by : achraf, powered by : blogger
كافة الحقوق محفوظة موقع فنون الطبخ 2018